طرق علاج الشعر المقصف واطالته

ازاي تطولي شعرك لان اذا عوزتي الشعر يطول بيكون محتاج عناية اكتر وخصوصا للأطراف وده عشان تبقى الاطراف صحية وكمان عشان الشعر يطول

لو الاطراف ناشفه ومقصفة وباهتة هتلاقيها بتتكسر وبتتقطم من التسريح ومن اقل حاجة وكمان شكلها بيبقى مش حلو خاالص وبتبان جداا خصوصا لما تعملى ديل حصان او تسيبى شعرك على ضهرك

ان اتباع الطرق دى هيحسن من حالة الاطراف ونهايات الشعر جداا بس هتحتاجى لمداومة بروتين بسيط على طول لان بعد مرحلة العلاج بتيجى مرحلة الوقاية زى اللى بشرتها دهنية وماشية على روتين معين مناسب لنوع بشرتها هتلاقى بشرتها نقية وصافيه ومفيهاش اى دهون زيادة او حبوب لكن بمجرد انك تسيبى الروتين ومتعمليش اى حاجة هترجع للاسف البشرة تانى لمشاكلها فهى دى نفس الفكرة فى الشعر الجاف او الاطراف الجافة انك بعد ما تعالجى المشكلة لازم تداومى على روتين معين مناسب ليكى وليها وتنتظمى عليه على طول


الاول عن اشكال واسباب كل شكل من الاطراف المتقصفة split ends causes

ده شكل الاطراف الصحية

اول 3 انواع من التقصف فيها اول مرحلة لما بيحصل التقصف والشعرة تتقسم ولحد ما توصل للtriple split ويكون فى اكتر من اتجاه

  اشكال اخرى فيها الانقسام الغير مكتمل incomplete split ده بيكون بسبب التسريح العنيف او اللى باستعجال و الانقسام اللى بيجى من جنب الشعرة deep split بيكون بسبب الصبغات او الكيماويات والضعف العام والtaper ودى انا بشوفها فى نهايات شعرى فى الغالب واكبر اسبابها الصبغات وزيادة سمك الشعرة فى نهايتها thickening وده بيكون بسبب لغبطة الهرمونات وعدم انتظامها واللى عندها الشكل ده تعمل تحليل هرمونات او بيكون بسبب تناول بعض الادوية لمدة طويلة

 الانقسامات اللى بتبقى كتير كده فى الوايت white split ده بيبقى بسبب استحدام الكيماويات والصبغات الكتير جداا اما لما الشعرة تميل للجنب او اليمين فى right angle بيكون بسبب ان الشعر بيتسرح بطريقة ثابتة او انك مستمرة على تسريحة معينة او اتجاه معين لشعرك فى التسريح
لما الشعره تميل لجنب ويبقى فيه زى خرم بين المثلث اللى الشعره مالت عنده زى off shoot بيكون بسبب الجو او الملوثات البيئية او الكيماويات الكتير وكمان بيكون نتيجة للضغف العام

 اول شكل اللى هو الcrinkle ده بيكون بسبب شد الشعر لفوق للكحكة العالية مثلا او بسبب شد الشعر للجنب زى لما تعملى طاقية
والحرارة والصبغات اما الشكل التانى اللى هو tree split ده بيكون فيه انقسامات كتير جدا للشعره ده فى الغالب بيكون بسبب التعرض الشديد للشمس او ان الشعر بيتعمل ديل حصان كتير فالنهايات بتتحك فى الهدوم
اما الشكل التالت feather ان الشعر تتقسم بشكل فظيع تبقى عاملة زى الريشة هشة ومتدمرة وده بيكون بسبب التعرض للكيماويات الكتير وان الشعر مش بيتقص على مدى بعيد
اما العقدة knot وده انك تلاقى الشعره معقودة ده بيكون بسبب الجفاف والضعف العام والتعرض للشمس والرياح والاتربة وبيحصل اكتر للشعر الكيرلى

علاج التقصف

بيكون بأكثر من شكل على حسب كل واحدة وتفضيلاتها الشخصية وحسب مدى التلف اللى حاصل لاطراف الشعر فكل واحدة تشوف الطريقة المناسبة ليها وتعملها وانا عن نفسى جربتهم كلهم على فترات كتير

اتخلصى من الاطراف الجافة

برضه بيكون بأكتر من طريقة لو حابة تطولى شعرك والتلف مش كتير هتقسمى الشعر نصفين وتجيبيهم قدامك وتقسميهم تانى لنصفين او تلاته حسب كثافة شعرك وتلفى الجزء ده وتبقى ماسكاه من تحت وتقصى كل الشعر المتطاير وده يناسب جدا البنات اللى حابة تطول شعرها ومش عايزة تخسر طول ودى صورة بتوضح الطريقة دى

او يتلف على قلم او ما يشابهه زى الصورة دى

  او انك تضفري الشعر وتقصى نهاية الضفيرة وده للبنات اللى مستعدة تخسر الجزء الاخير الرفيع من نهايات شعرها زى الصورة دى

  وهنا الصورة دى بتوضح ليه وازاى الشعرة بتضعف وده لان الطبقات بتاعتها بتتأكل وبتتدمر بالمؤثرات البيئية والكيماويات اللى بنستخدمها وغيره وتانى صورة بتوضح انتى مفروض تقصى من اول فين

  او انك تحددى بنفسك وبايدك النهايات المحتاجة تتقص زى الصورة دى

العلاج بالزيوت والكريمات العلاجية 

 كريم نيوتريسرات
ده كريم قوامه تقيل الى حد ما بيجيب نتيجة مع الانتظام عليه لاسبوعين لاحظت ان الاطراف بقت انعم واقوى ومش بتهيش زى الاول
طريقة الاستخدام : بيتحط على شعر مندى او جاف على الجزء الاخير بس من شعرك يعنى ديل الحصان من تحت وتعمليلها مساج عشان تشرب الكريم ويتساب على الشعر مرة يوميا لحد ما تحسى بتحسن تقللى لمرة كل 3 ايام

كريم بروتى كير
ده كريم علاجى وبديل ارخص لنيوتريسرات ولاحظت تحسن كبير برضه مع لاانتظام عليه وكنت بستخدمه لوحده واوقات بالتبادل مع نيوتريسرات
طريقة استخدامه : على شعر جاف او مندى وممكن يستخدم على الشعر كله بس ضرورى تركزى على الاطراف ونفس فكرة نيوتريسرات مرة يوميا لحد ما تحسى بتحسن

امبولات فيلابورجينى
دعى عبارة عن امبولات بتفضى نصف امبولة بعد غسيل الشعر مرة او مرتين فى الاسبوع حسب مدى التلف اللى عندك ويفضل بعدها نقطتين من اى نوع زيت خفيف لانه بيركز على تقوية الاطراف اكتر من ترطيبها

الزيوت المرطبة والمعالجة للتقصف والتكسر

من احسن واكتر الزيوت فعالية لترطيب وعلاج تلف الاطراف وده لانها بتتغلغل لاعمق طبقات الشعرة الداخليه هى زيت جوز الهند البيور وزيت الارجان وزيت الماكديميا وزيت اللوز الحلو وزيت رجب العطار " ده مجموعة زيوت ممتازة " هو بس مش باين فى الصورة
طريقة الاستخدام : بتختارى اى نوع من الانواع دى وبتحطى نقطتين قبل او بعد الكريم او لوحدهم على نهايات الشعر مرة يوميا لحد ما تحسى بالتحسن تبقى يوم بعد يوم

الماسكات العلاجية

ماسكات كتير بتركز على كلمات زى repair / strengthening واللى جربتهم جارنييه فروكتيز وسكين دكتور وناتورا فيتا دول فعلا بتحسى معاهم ان الشعر بقى اقوى وممكن تحطيهم على ديل الحصان بس لان هما هدفهم هو تقوية الشعر الضعيف واللى بيتكسر بسهوله فمفيش داعى تحطيهم على الشعر من فوق لو فى حالة صحية كويسة
ماسك اكرينال
من الماسكات اللى عجبتنى جدا جدا وده لانه بيقوى وبيرطب بعمق وفعلا بيعالج الجفاف فى خلال شهر بتحسى ان الشعر احسن وهما كاتبين ده على العبوة ان الماسك علاجى بيستخدم مرة فى الاسبوع لمدة شهر بس انا كررته وبقالى اكتر من 4 شهور بستخدمه بالتبادل مع ماسكاتى التانية وده من كتر ما عجبنى وانا صورتلكوا مكوناته هتلاقوا الشيا بتر وسيرم ديل الحصان من اوائل المكونات فيه

الماسكات الطبيعية

ماسك رقم " 1 "

افوكادو وزيت جوز هند وعسل 

بيتحط لمدة ساعة على ديل الحصان بس وممكن يتلف بنايلون او ورق قصدير او اى كيس ويتغسل

ماسك رقم " 2 "

موزة وعسل وزبادى

بيتحط لمدة ساعتين على ديل الحصان بس ويتلف بنايلون ويتغسل

ماسك رقم " 3 "

زيت زيتون وعسل

ممكن يتحط لاكتر من ساعتين على ديل الحصان ويتغسل

ماسك رقم " 4 "

عسل اسود مخفف بزيت جوزهند او زيت زيتون

بيتحط على ديل الحصان لمدة ساعة ويتلف بنايلون ويتغسل

ماسك رقم " 5 "
تدوبى معلقة صغيرة من السكر البنى فى كوباية مية سبق غليها وبتغرقى بيها ديل الحصان بس وبيتساب نصف ساعة ويتغسل
وحتى كتير من البحوث اكدت ان شرب معلقة من العسل الاسود يوميا بيساعد على الحد من تساقط الشعر وانباته

ماسك رقم " 6 "

معلقتين كبار من زيت جوز الهند مع كبسولتين فيتامين e

بيتحط على ديل الحصان وممكن يتساب لتانى يوم ويتغسل


ماسك رقم " 7 "

صفار بيضة وزيت جوز هند و زيت زيتون ومعلقة صغيرة عسل

الشامبو وغسيل الشعر

- يفضل انك تسرحى شعرك قبل غسيله وده عشان تقللى من التشابك وبالتالى هتقللى من التكسر
- لازم يكون الشامبو خفيف mild وياريت يمكون سلفات وصوديوم فري وبتركزى على ان الشامبو يكون للفروة متحطيش على الاطراف ابدا لان المية بالشامبو هتنزل على كامل الشعر وانتى بتشطفيه
- ركزى ان البلسم او حمام الكريم يكون لديل الحصان وللاطراف بشكل خاص
ودى شامبوهات انا بحبها جداا لانها خفيفة خاالص على الشعر وكيماوياتها قليلة خاالص سكين دكتور بالجينسنج و اللى فى النص سكين دكتور بزيت الارجان وشامبو اكرينال ومنهم شامبو جليس بالموركان اويل لونه بنى خفيف جدا وبيرطب وينضف بلطف جداا لكن للاسف نسيت اصوره

تسريح الشعر

-عشان تنشفى شعرك يفضل ان يكون بتى شيرت قطن او فانلة نضيفة ومش بالفرك قد ما بالطبطبة
- وقبل ما تسرحى شعرك لازم ترطبيه باى شكل انتى متعودة عليه بكريم او زيت او الاتنين قبل ما تسرحيه بربع ساعه وده عشان تدى فرصة للشعر انه يتشرب الترطيب وبالتالى يتسلك اسرع ويحتفظ بالترطيب داخله

اتجنبى المكوة والسيشوار والحرارة

وده لان الحرارة بتتلف الشعر وبتضفع من طبقات الشعر وتكسر نهاياته عشان كده حاولى تتجنبى الحرارة تماما ولو للضرورة يبقى مرة فى الشهر على الأكثر